Stjörnubílar ehf. hafa nú tekið í notkun nýja vefsíðu.

Starfsmenn Stjörnubíla á Ísafirði vilja koma því á framfæri, vegna umræðu síðustu daga um meinta slæma hegðun nemenda Menntaskólans á Ísafirði á viðburðum tengdum skólanum, að þeim finnist einungis einblínt á slæma hegðun einstakra nemenda skólans. Stjörnubílar tóku að sér að aka nemendum á dansleik á vegum Menntaskólans á Ísafirði í félagsheimili Flateyrar í upphafi þessa skólaárs og var hegðan þeirra til fyrirmyndar að mati starfsmanna Stjörnubíla. Hafi nemendur hegðað sér einstaklega prúðmannlega á dansleiknum og þegar fara átti heim var ekki þörf á að reka unglingana í rútur líkt og vill gerast með lífsreyndari íbúa Vestfjarða. Umgengi og hegðun á svæði dansleiksins hafi verið til fyrirmyndar og eins í rútunum. Þykir þeim því leitt að sjá hvert stefnir fyrir þeim nemendum skólans sem vilja fá að stunda félagslíf líkt og aðrir íbúar á Vestfjörðum ef banna á alla viðburði sem þau gætu hugsanlega sótt. 

Rútufyrirtækið Stjörnubílar og ferðaskrifstofan Vesturferðir náðu í gær samningum um akstur skemmtiskipafarþega í sumar. Samningurinn felur í sér að Stjörnubílar sjá um allan akstur sem tengist skemmtiskipum á vegum Vesturferða, bæði með eigin rútum og rútum samstarfsaðila. Í frétt á heimasíðu Vesturferða segir að það sé von beggja aðila að samningurinn veiti báðum aðilum öryggi og festu í því mikla starfi sem framundan er við þjónustu við skemmtiskipafarþega. Í sumar er áætlað að 28 skemmtiferðaskip komi til Ísafjarðar, það fyrsta kemur 25. maí og það síðasta kemur 2. september. Farþegafjöldinn á skipunum er samtals tæp 19.000 manns. 

Ný rúta hefur bæst í bílaflota Stjörnubíla á Ísafirði en um er að ræða bíl af Benz gerð sem keyptur er notaður af fyrirtæki í Reykjavík. Rögnvaldur Ólafsson, hjá Stjörnubílum, segir rútukaupin lið í endurnýjun bílaflota fyrirtækisins. Fullkominn útbúnaður er í bílnum, m.a. salerni, sjónvarp, hallanleg sæti og fleira. „Þetta er einn með öllu. Það má segja að hann innihaldi alllann þann búnað sem gerð er krafa um í dag og rétt rúmlega það“, segir Rögnvaldur. 

Aðspurður um verkefnastöðuna segir Rögnvaldur að ágætlega hafi gengið að bóka verkefni fyrir nýju rútuna. „Það á eftir að koma í ljós hvað verður gert næsta sumar. Ef bjóðast álitleg verkefni hérna á svæðinu þá stökkvum við á þau en annars erum við klárir í að starfa á öllum vígsstöðvum og reynum að vera opnir fyrir möguleikum“, sagði Rögnvaldur.